بسم الله الرحمن الرحيم
للاديب الكاتب / أحمد عبد اللطيف النجار
مرثية شهداء رشيد ... 2016
إليهم إلي شهدائنا الأبرار ضحايا الهجرة غير الشرعية ، في جنة الخلد تنعمون بإذن الله .
وإلي أم الدنيا وجميلة الجميلات ، نحبك رغم كل شيء ونأمل في حبك ورضاكِ !!
كلمات / أحمد عبد اللطيف النجار
شاعر أم الدنيا الحزين
يا خسارة علي اللي راحوا
واللي غرقوا في رشيد
يا خسارة شباب بلدنا
ميت خسارة علي الشهيد
قال مسافر ...
قال مهاجر ..
وابتعد هناك بعيد
أصل أم الدنيا
أكلت ولادها ..
وقالت مزيد !!
بس يا خسارة يا أمي
لما قلبك يبقي قاسي
لما عقلك يبقى ناسي
وضناكي يكون شريد
كنت أتمنى ترابك
كنت مستحمل عذابك
واسجد واتشهد..
في بابك !
أنتِ إيه اللي أصابك ؟!!
خلا جرحك جاب صديد !
روحنا يا غالية علينا
بعنا ما تملك ايدينا
والسراب اشترينا
لأجل نموت غرقانين !
كنا عشمانين ...
في عطفك
كنا طمعانين ...
في لطفك
وأنتِ سيبتينا حيارى
اصطادونا المجرمين
قالوا دنيا هناك جديدة
والحياة حلوة وسعيدة
كلها طعمة فريدة ..
لأجل نبقي طمعانين !
وإحنا ليه ؟ .. وفي إيه ؟
ها نطمع ...
لو أمرتينا هانسمع
لو حضنتينا ...
ها نخضع
مش نموت عطشانين !
الوداع يا أرضنا
الوداع يا أهلنا
الفراق مكتوب لنا
نفترق عن بعضنا
مصر يا أمنا ...
مهما نبعد أو نهاجر
أنتِ روحنا ودمنا
فيكي عشنا حزننا ..
فيكي شوفنا فرحنا ..
والزمن مهما يطول ..
أنتِ آخرة صبرنا !!
أنتِ آخرة صبرنا !!
أنتِ آخرة صبرنا !!
أحمد عبد اللطيف النجار
شاعر أم الدنيا الحزين
ليست هناك تعليقات:
إرسال تعليق