قصيدة بعنوان البصارة ...بقلمي....
الاديبه الكاتبه والشاعره : ملك الأصفر
........................
مرة بماضي الزمان فتت على بيت الجيران ....
وكانت بنتن زعلانة عندن وإسما إيمان ....
إيمان بنت صبية وبالناس ما عندا خبرة ....
وبإيدا كان في إسوار وعم بتطرز بالإجرة ....
فاتت وحدة غجرية لعندا من الصبحية ....
وقالت إنو بتبصر بإصابة حقيقية ....
وغليو القهوة وشربنا وشربت معنا الغجرية ....
وبعدا فتحتلا هالفال وشغلت بال الصبية ....
وقالتلا بيضي هالفال بسرعة يا نور عينيي ....
حتى احكي يلي صار وخبرك كل الخبرية ....
تململت البنت شوية وقالتلا للغجرية ....
ما معي اعطيكي فلوس دخلك راعيني شوية ....
الغجرية قالت بالحال عطيني بسرعة هالإسوار ....
حتى أرضي أخواتي ويحكولي شو يلي صار ....
البنت بسرعة أعطتها الإسوارة وما خبتها ....
وقالتلا احكيلي بسرعة القصة كلا برمتها ....
الغجرية مدت بالحال إيدا وأخدت الإسوار ....
وقالتلا يخرب بيتو رح يتجوز هالغدار ....
الرجال ما بيتأمنلو متل المية بالغربال ....
شوفي هالخاين شوفي خلاك مشغولة البال ....
وضبت غراضا بسرعة وبعدت عنا الغجرية ....
وتركت جارتنا إيمان مشلوشة كتير يا خطية ....
ومن بعدا صحيت إيمان على لعبة الغجرية ....
بعد ما طار الإسوار وانضحك عالصبية ....
........................
ملك الأصفر
ليست هناك تعليقات:
إرسال تعليق